«Яўген Мацвееў — вялікі чалавек Наваельнянскай зямлі»

2 снежня споўнілася 80 гадоў з дня нараджэння таленавітага доктара, паэта, мастака Яўгена Аляксеевіча Мацвеева. Яго лёс цесна звязаны з гарадскім пасёлкам Наваельня, дзе пражыў 42 гады, працаваў доктарам-фтызіятрам рэспубліканскага санаторыя, пісаў вершы, кіраваў драматычным гуртком, дзе пахаваны. У народным гісторыка-краязнаўчым музеі «Дзеці ліхалецця» Наваельнянскай сярэдняй школы прайшлі юбілейныя «Мацвееўскія чытанні», прымеркаваныя да 80-годдзя з дня нараджэння паэта. Удзел у чытаннях прынялі супрацоўнікі Дзятлаўскай раённай бібліятэкі, якія арганізавалі кніжную выставу і агляд творчасці па кнігах паэта.

На літаратурнай гасцёўні прысутнічалі старшыня Беларускага літаратурнага Саюза «Полацкая ветка» Алег Зайцаў, выдавец, журналіст, літаратар, публіцыст; паэтэсы Ірына Мацкевіч і Алена Цэйко. Таксама на сустрэчу былі запрошаны калегі па рабоце, аматары талента Яўгена Мацвеева, паэты Дзятлаўшчыны з раённага аб’яднання «Пралескі», якім доўгі час кіраваў паэт. Удзельнікі мерапрыемства наведалі і літаратурны пакой, які створаны пры Наваельнянскай гарпасялковай бібліятэцы — цэнтры зносін і інфармацыі.